Maðurinn sem myrti lögreglumann í París í gærkvöldi og særði tvo aðra var 39 ára með franskt ríkisfang og var undir eftirliti lögreglunnar vegna mögulegra tenginga við hryðjuverkahópa og var talið að hann væri róttækur íslamisti. Frönsk yfirvöld segja að um hryðjuverk hafi verið að ræða og hafa hryðjuverkasamtökin ISIS sagt að maður úr sínum röðum hafi myrt lögreglumanninn.  Árásin gæti haft áhrif á val margra kjósenda á sunnudaginn en þá ganga Frakkar að kjörborðinu og kjósa nýjan forseta.

Lögreglan bar kennsl á manninn í gærkvöldi en hefur ekki birt nafn hans opinberlega. Mikil öryggisgæsla verður í Frakklandi í kringum kosningarnar og segir Bernard Cazeneuve forsætisráðherra að allt öryggislið landsins verði á vakt á sunnudaginn:

Það má ekkert trufla grundvallarathöfn lýðræðis okkar,

sagði hann við blaðamenn eftir neyðarfund ríkisstjórnarinnar. Franska lögreglan er nú með fjölskyldu mannsins í haldi. Annar maður, grunaður um aðild að verknaðinum hefur gefið sig fram við belgísk yfirvöld. Í bíl byssumannsins fannst haglabyssa, eintak af Kóraninum og hnífar.