Framboðslistar Vinstri grænna í Reykjavík voru samþykktir á flokksfundi í kvöld. Þá má sjá í heild sinni á vef VG. Varðandi efstu sætin kemur fátt á óvart, áður höfðu verið sögusagnir um að Kolbeinn Óttarsson Proppé myndi verða nýr maður í öðru sæti listans öðru Reykjavíkurkjördæminum, hann verður í Reykjavík suður, á eftir Svandísi Svavarsdóttur.

Kolbeinn hefur lengi verið viðriðinn VG, hann var kosningastjóri fyrir flokkinn eftir að hann var stofnaður, en síðan hefur hann meðal annars fengist við blaðamennsku, lengst á Fréttablaðinu.

En það eru listamennirnir sem Vinstri græn bjóða upp á listum sínum sem vekja athygli. Þar má fyrstan nefna enga smákanónu, Ragnar Kjartansson, sem er orðinn heimsstjarna í myndlist, í 9. sæti í Reykjavík norður. Og svo er það söngkonan vinsæla, Sigríður Thorlacius, í 19. sæti á sama lista. Hildur Knútsdóttir rithöfundur er í 3. sæti í Reykjavík suður – og gæti væntanlega orðið varaþingmaður.

Þá má nefna gítarleikarann snjalla, Björgvin Gíslason, í 14. sæti í Reykjavík suður, þar er að finna Úlfar Þormóðsson rithöfund í 20. sæti – og áður hefur þess verið getið að Gunnar Þórðarson hefur tekið 8. sætið í Suðurkjördæmi.