Viðreisn er að fá til sín mjög öfluga liðsmenn í framboð, því verður ekki neitað. Pawel Bartozsek og Þorsteinn Víglundsson eru báðir afburðaklárir menn. Það vekur líka athygli að framkvæmdastjóri SA, helsta félagsskapar atvinnulífsins, skuli fara í framboð fyrir annan flokk en Sjálfstæðisflokkinn. Á árum áður hefði það verið óhugsandi.

Pawel og Þorsteinn eru báðir hægri menn, markaðssinnaðir og alþjóðasinnaðir. Það er í þessum tveimur atriðum sem skilur helst milli þeirra og Sjálfstæðisflokksins eins og hann er nú um stundir. Það hefur verið talað um Viðreisn sem einhvers konar miðjuflokk, en þarna hallast hann til hægri. Með þessa menn í forystu er hann skeinuhættari Sjálfstæðisflokknum en manni hefur virst, en ólíklegri til að skaða Samfylkinguna. En hún á náttúrlega nóg með að verjast ógninni frá Pírötum.

Á móti sýnist manni Píratarnir hallast lengra til vinstri en horfur voru á. Áherslur þeirra eru býsna kratískar. Þetta gæti minnkað líkurnar á að Píratar og Viðreisn nái saman í ríkisstjórn.