Datt í það í gær á hótelherbergi að horfa aðeins á Russia Today sem er einhver sérkennilegasta sjónvarpsstöð í víðri veröld – hún sendir út algjörlega blygðunarlausan áróður fyrir stjórn Pútíns en flytur þess á milli fréttir um hvað allt er í kalda koli á Vesturlöndum.
Rétt eins og fjölmiðlar á Sovéttímanum. Ég kynntist því aðeins sjálfur á sínum tíma þegar ég fór austur fyrir tjald og fékk nasaþef af fréttaflutningi þar. Ég man til dæmis eftir því um miðjan áratuginn þegar því var komið inn í hausinn á fólki í kommúnistaríkjum að HIV væri samsæri CIA.
Í gær gengu aðalfréttirnar á RT út á algjöra upplausn í Frakklandi vegna Evrópukeppninnar í fótbolta. Manni skildist á fréttunum að allt logaði þar. Russia Today hefur fengið vestræna „fréttamenn“ til að fronta dagskránna, þeir virka reyndar þriðja flokks miðað við það sem maður sér í sjónvarpi vestar í álfunni, en þarna var mest sagt frá ofbeldi fótboltabulla frá Wales og Slóvakíu, en ef minnst var á rússneska áhorfendur var það mest til að sýna að þeir væru í raun til algjörrar fyrirmyndar.
Við það skipti ég um stöð.
