Leið til að ná til kjósenda? Spænska stjórnmálahreyfingin Podemos setti saman kosningabækling líkt og það væri auglýsingapési frá IKEA. Hann er byggður upp í köflum eins og IKEA bæklingur, er 192 blaðsíður, fjallar um ýmis málefni, en sýnir frambjóðendur í eldhúsinu, svefnherberginu, stofunni og á fleiri stöðum innan heimilisins.

Podemos, sem er nýlegt stjórnmálaafl, er orðið leiðandi á vinstri væng stjórnmálanna á Spáni. Það fékk 21 prósent í kosningunum í desember. Úrslit þeirra voru hins vegar svo óljós að kosið verður aftur 26. júní. Podemos hefur verið með í kringum 24 prósent í skoðanakönnunum en gamli Sósíalistaflokkurinn er ívið lægri, mælist með aðeins meira en 20 prósent.

Hinn hægri sinnaði Þjóðarflokkur, flokkur Marianos Rajoy forsætisráðherra, er með um 30 prósent í könnunum. Fjórði stærsti flokkurinn er svo Ciudadanos (Borgararnir) frjálslyndur miðjuflokkur sem er stofnaður í Katalóniu en er andsnúinn þjóðernisstefnu í hverri mynd – þar á meðal hinni katalónsku.

Aðrir flokkar eru með minna og það vekur athygli að hægriöfgaflokkar hafa ekki náð neinum árangri á Spáni.