Björgólfur Jóhannsson, forstjóri Icelandair, segist telja að Ísland geti tekið á móti 3-5 milljón ferðamönnum á ári. Hann er á móti því að leggja komugjöld á túrista eða svo segir í frétt á mbl.is:

Ef við ætl­um að fjölga ferðamönn­um hér, segj­um upp í 5 millj­ón­ir á ári, þá byrj­um við ekki á því að leggja svona gjald á þá sem ákveða að koma hingað.

Á síðasta ári var fjöldi ferðamanna tæplega 1,3 milljónir. Þá var eins og ýmislegt væri komið að þolmörkum, til dæmis nokkrir þekktir ferðamannastaðir og svo útleiga húsnæðis til ferðamanna í Reykjavík.

Í ár er gert ráð fyrir að fjöldinn verði 1,7 milljónir, margir hafa áhyggjur af því hvernig staðan verður yfir háferðamannatímann í sumar.

Svo er líka spurningin hverjir eigi að vinna við alla þessa ferðamennsku. Í frétt sem birtist á Vísi í dag segir að um fjörutíu prósent nýrra starfsmanna í ferðaþjónustu komi erlendis frá. Þetta eru að miklu leyti láglaunastörf, eða eins og segir í fréttinni:

Mest vantar af fólki í ræstingar/þrif, starfsmenn í gestamóttöku, eldhús og veitingasal, leiðsögumenn, sölu- og afgreiðslufólk og faglærða matreiðslumenn. Erfiðast er að manna í ræstingar/þrif og í stöður faglærða matreiðslumanna.

Maður spyr einfaldlega: Hver er gæti verið tilgangurinn í því að fara þessa leið, með 5 milljón túrista og vinnuaflið mestanpart innflutt?

Þetta er spurning sem við þyrftum að svara.

Hér er svo forvitnileg tafla frá Ferðamálastofu, sýnir fjölda ferðamanna á Íslandi frá 1949. Þarna sjáum við glöggt hina miklu fjölgun síðustu fimm árin sem hefur í raun gerbreytt atvinnulífi og efnahag á Íslandi.