Það gæti farið að hitna aðeins í kolunum í forsetakosningunum.

Guðni Th. Jóhannesson er greinilega á leiðinni í framboð.

Það boðar enginn fund í stórum sal með margra daga fyrirvara til að skýra frá því að hann ætli ekki að gera eitthvað.

Og það á uppstigningardag.

Fundurinn er boðaður á Facebook. Hann er í Salnum í Kópavogi, eins og tölur standa nú hafa 1.6000 áhuga á að mæta, 442 ætla að mæta, en 7.100 hefur verið boðið. Miðað við þetta þyrfti kannski frekar að panta Laugardalshöll?

Það er líklega sniðugt að byggja upp spennu fyrir þennan viðburð – þótt varla dyljist neinum hvað gerist þarna.

Frambjóðandinn væntanlegi verður líka að láta hendur standa fram úr ermum. Þegar framboðið verður tilkynnt verða ekki nema mánuður og tuttugu dagar til kosninga, það þarf talsvert átak til sigra Ólaf Ragnar Grímsson.

Þá erum við að tala um fundahöld og ferðalög út um byggðir landsins. Það er svo spurning hvort þurfi ekki líka að eyða fé í að auglýsa í fjölmiðlum.

En um leið bendir flest til þess að framboð Andra Snæs Magnasonar sé ekki að gera sig – ekki þegar Guðni er líka kominn til skjalanna.