Það er mikið deilt um jólasýningar leikhúsanna, sumt af því virðist nokkuð vanstillt, en ég er sannfærður um að bestu sýninguna á þessum jólum sá ég í Háskólabíói í gærkvöldi. Þar fór Ari Eldjárn á kostum í tveggja stunda löngum tour de force þar sem hann stóð einn á sviðinu og fór um víðan völl í áramótaskopi sínu.

Ari hefur náð betri tökum en nokkur Íslendingur á uppistandsgríni, tungumálið er ákveðin hindrun en ég er eiginlega viss um að hann er á heimsmælikvarða á því sviði. Hann náði að ríghalda þessum stóra sal allan tímann þar sem hann fór yfir viðburði ársins með viðkomu í Sigmundi Davíð, Baltasar Kormáki, ferðaþjónustunni, afmæli Rúv, tinder, Bubba Morthens, fótboltalandsliðinu og ýmsu fleiru.

Ari fyllti Háskólabíó fjórum sinnum, tvö kvöld í röð, steig hvergi feilspor, og hann hefði ábyggilega getað haft sýningarnar mun fleiri. Lokaatriðið þar sem hann messaði yfir ferðaþjónustunni í líki Bubba Morthens var brjálæðislega fyndið og það var alvöru hápunktur þegar birtist óvænt að baki honum heil rokkhljómsveit, en salurinn söng hástöfum þekkt lag Bubba með textanum „þið munið öll leigja“.

Mér heyrðist líka á honum í enda sýningarinnar að hann ætli að endurtaka leikinn næstu jól, þetta er of gott til að gera annað.