Þegar þingmenn eru skildir eftir niðri á Alþingi, nánast án ríkisstjórnar og eiga að fjalla um stórmál er ekki endilega víst að öll dýrin í skóginum verði vinir. Tónninn hefur samt verið eitthvað í þá veru undanfarið – eins og allt verði gott ef þingheimur fær að ráða án afskipta framkvæmdavaldsins.
En svo kom babb í bátinn. Það er heilmikill ágreiningur um fjárlögin og líka um frumvarpsbálkinn um lífeyrisréttindi.
Og þá fara þeir að renna saman sem hugsanlega eiga heima í sama liði. Sjálfstæðisflokkurinn og Viðreisn eru mjög samstíga og Björt framtíð fylgir Viðreisn hvert fótmál.
Guðni Th. Jóhannesson hefur látið stjórnarmyndun dankast undanfarið, það hefur enginn fengið umboð síðan Birgitta skilaði því. Líklega er vit í þessu, tími þingmanna fer í störfin á Alþingi – þar, og sérstaklega í fjárlagavinnunni, kemur glöggt í ljós hverjir eiga í rauninni samleið.
