Út um allt er fólk sem í kvöld dauðsér eftir því að hafa keypt brúnegg, sumir árum saman – á heimilinu hérna er drengur sem spældi sér tvö brúnegg í morgunmat.

Hann tók restina af eggjabakkanum áðan og henti honum. Ekki er ólíklegt að einhverjum hafi dottið í hug að henda eggjum í höfuðstöðvar Brúneggja.

Það mun varla nokkur maður láta sér koma í hug að kaupa þessi egg eftir umfjöllun Kastljóss í kvöld. Líklega láta verslanir þess vöru hverfa strax í nótt. En hví var ekki látið vita af þessu fyrr? Óhroðinn hefur staðið yfir lengi.

Allt þetta mál vekur líka spurningar um hvort nokkuð sé að marka orðið „vistvænt“ þegar framleiðsla af þessu tagi er annars vegar?

Eins og má sjá eru umbúðirnar grænar – liturinn gefur til kynna að varan sé holl og góð – og svo stendur skrifað stórum stöfum að eggin séu vistvæn. Það er óforskömmuð blekking, samkvæmt Kastljósi, það sem þarna fer fram er sóðaskapur út í gegn og ógeðslegt dýraníð.