Brynjar Níelsson segir að Píratar muni lenda á ruslahaugum sögunnar.

Brynjar gerir sér kannski ekki grein fyrir því sjálfur, en þarna er hann að vitna í sjálfan Lev Trotskíj, einn frægasta byltingarmann og kommúnista sögunnar.

Ruslahaugar eða öskuhaugar sögunnar var einn uppáhaldsfrasi hins ofurmælska Trotskíjs.

Hann þrumaði þetta til dæmis yfir andstæðingum sínum í hreyfingu mensévíka á þingi á allsherjarþingi sovétanna í Petrograd á tíma októberbyltinarinnar. Trotskíj var þá kominn í flokk bolsévíka, sem vildu breyta samfélaginu hratt og með ofbeldi, en mensévíkar voru meira í ætt við sósíaldemókrata.

Þeim var líka útrýmt nokkuð fljótt og örugglega eða hröktust í útlegð undan bolsévíkaföntunum. Hótanir þeirra voru yfirleitt ekki innantóm orð.

Þið eruð aumkunarverðir og fullkomlega einangraðir! Þið eruð gjaldþrota! Hlutverki ykkar er lokið! Hypjið ykkur þangað sem þið eigið heima – á öskuhaug sögunnar!