Það er nokkuð athyglisvert að fylgjast með því hvernig Bjarni Benediktsson heldur utan um stjórnarmyndunarviðræðurnar. Hann hefur haldið fundi í fjármálaráðuneytinu og í Ráðherrabústaðnum – það eru tveir hásalir valdsins og kannski ekki alveg comme il faut – en nú mun hann vera farinn með teymi sitt, Viðreisn og Bjarta framtíð upp í sveit að því er sögur herma.
En það vekur ekki síður athygli hverja Bjarni velur í hópinn sem fer í viðræðurnar af hálfu Sjálfstæðisflokksins. Þarna eru tveir nýkjörnir þingmenn og óreyndir, Áslaug Arna Sigurbjörnsdóttir og Teitur Björn Einarsson, og svo Svanhildur Hólm Valsdóttir sem hefur lengi verið aðstoðarmaður Bjarna. Teitur hefur reyndar líka aðstoðað Bjarna, svo segja má að hann haldi spilunum þétt að sér.
Reyndir þingmenn eru hins vegar víðs fjarri eins og til dæmis Kristján Þór Júlíusson og Guðlaugur Þór Þórðarson – en sá síðarnefndi hefur nú setið næstlengst á þingi af þeim sem hlutu kosningu fyrir hálfum mánuði.
