Mér hefur fundist allt í kringum mig að fólk viti ekki hvað það á að kjósa. Að það eigi í mestu erfiðleikum að gera upp hug sinn. Ákveði sig kannski ekki fyrr en á kjördag eða í kjörklefanum.

Ég hef á tilfinningunni að aldrei hafi fleiri verið óráðnir fyrir kosningar. Það eru jú margir flokkar í boði, sumir nokkuð svipaðir hvað varðar stefnumál, þótt saga þeirra sé ólík.

Sjálfur er ég í þessum hópi, er að hugsa um að kjósa flokk að morgni en að kvöldi er ég hættur við að kjósa hann. Það þarf ekki sérlega mikið til að færa mann til.

Ég uppgötvaði líka í gær, og það er í fyrsta sinn að þetta gerist, að ég er búinn að steingleyma hvað ég kaus í síðustu kosningum.