Þessa dásamlegu mynd setti Helgi Ingólfsson inn á vefinn Gamlar ljósmyndir. Hún sýnir norðurhluta Bergstaðastrætis nálægt 1905, eða það telur Helgi. Þarna eru hús sem eru horfin, timburhúsið sem er á móti Hegningarhúsinu nefndist Geysir, Guðjón Friðriksson segir að þar hafi verið rekin veitingastofa og gistihús.
Við sjáum að múrinn í umhverfis Hegningarhúsið er öðruvísi en síðar varð. Hann er framan við hliðarálmuna sem nú snýr beint út að götunni.
Þarna fyrir framan var svokölluð Kjaftaklöpp, svo nefnd vegna þess að þar var sagt að fólk kæmi saman, ræddi málin og skiptist á slúðri. Sjálfur drekk ég kaffi flesta morgna á litlu kaffihúsi sem nefnist Kaffifélagið, það er rétt þarna fyrir neðan. Mætti kalla það Kjaftaklöpp, en við þetta samsæti hefur farið að loða heitið Morgunstéttin.
Einhvern tíma var sagt að þarna væri mikið plottað á morgnana, en þau plott hafa alveg farið framhjá mér. Sjálfur er ég sérlega ólævís maður.
Takið eftir grjótgörðunum sem eru alls staðar umhverfis hús, þeir voru eitt einkennið á borginni, enda er hún byggð á grýttum holtum. Nú eru þeir mestanpart horfnir.
