Krabbamein á efnahagskerfinu í heiminum.

Þannig var skattaskjólum og skuggabankastarfsemi lýst í Silfri Egils 21. febrúar 2010. Þá var í viðtali John Christensen, hagfræðingur og sérfræðingur um slíka starfsemi. John Christensen var í þættinum sem fulltrúi samtaka sem nefnast Tax Justice Network.

Nafn Evu Joly er nefnt í þættinum en þegar hún kom hingað fyrst var aðalstarfi hennar að berjast gegn skattaskjólum og notkun þeirra, ekki síst þegar áttu í hlut ráðamenn og elítur í ríkjum þriðja heimsins sem máski höfðu stolið undan stórum hluta af auði heilla þjóða.

Á Evrópuþinginu hefur Joly svo mikið fjallað um skattaskjól og meðal annars lýst því yfir að Jean Claude Juncker, forseti framkvæmdastjórnar Evrópusambandsins, eigi að víkja úr embætti enda hafi hann verið forsætisráðherra í Lúxemborg á tíma þegar aðstoð við skattaundanskot og skattsvik voru þar stóriðnaður.

Athyglisvert er svo í viðtalinu við Christensen hvernig hann lýsir London sem fyrirrennara skattaskjólanna og því hversu mörg skattaskjólanna í heiminum eru tengd Bretlandi. Stærstu leikendurnir séu í raun Bretland og Bandaríkin.

Við verðum að gera okkur grein fyrir því að Panamaskjölin, eins stórkoslega áhugaverð og þau eru, veita bara smá innsýn inn í þennan heim. Þau eru svo óralangt frá því að vera öll sagan.

(Þökk sé Láru Hönnu fyrir að halda þessu efni til haga.)