Arion banki spáir því að 2 milljónir ferðamanna komi til Íslands árið 2018. Maður hváir – getur þetta verið satt? Við erum að tala um að hingað komi sexföld íbúatala landsins.

Aukningin hefur verið ofboðsleg síðustu árin, eins og sjá má í meðfylgjandi stöplariti, og fátt bendir til að henni linni. Sætaframboð í flugvélum heldur áfram að aukast og það er stöðug umfjöllun um Ísland sem ferðamannaland.

Gangi þetta eftir erum við að fara upplifa gjörbreytt Ísland. Ferðaþjónusta verður ekki bara stærsta atvinnugreinin – hún verður langstærst. Miklu stærri en sjávarútvegurinn sem hefur alltaf verið aðal á Íslandi – nema þessi fáu misseri sem bankarnir tóku völdin.

Stjórnvöld þurfa að fara að taka mið af þessu. Það verður ekki lengur hægt að draga lappirnar í uppbyggingu ferðamannastaða. Sveitarfélög þurfa að fá meira í hlut sinn af ferðaþjónustunni. Það mun þurfa fleira fólk til að vinna í ferðaþjónustu, það útheimtir fleiri innflytjendur og fleira fólk sem er menntað í greinum sem tengjast ferðamennsku. Kokka, leiðsögumenn, fólk sem kann til verka í hótelrekstri. Og það þarf að bæta samgöngur.

Okkur er tamt að halda að ferðamennirnir hætti bara að koma einn daginn, að þetta sé bóla – í því er fólginn ákveðinn fatalismi sem er mjög íslenskur, að allt hljóti að fara illa að lokum. Ferðamennirnir hverfi á brott eins og síldin á sínum tíma. En ef það gerist ekki – ja, þá verðum við að reyna að vera viðbúin.

Fjölgun ferðamanna síðustu tvö árin – og spá um framhaldið.