Píratar eru að slá alls konar met – í skoðanakönnunum. Þeir eru komnir upp í fylgi sem Sjálfstæðisflokkurinn gat vænst á góðum degi. Þeir eru að halda fylgi sem er yfir þrjátíu prósent mánuð eftir mánuð og halda áfram að hækka sig, eru nú komnir í 35,9 prósent.

Þetta er á sama tíma og Sjálfstæðisflokkurinn fer niður í 21,6 prósent og hefur ekki mælst minni síðan í hruninu. Á tímanum sem mælingin fór fram sendu Píratar frá sér róttæka sjávarútvegsstefnu og voru kallaði rótlausir af formanni Sjálfstæðisflokksins.

Það er ljóst að önnur eins ógn hefur ekki steðjað að fjórflokknum. Samfylkingin, með 9,3 prósent, hefur aldrei mælst lægri, en Vinstri grænir eru þó líklega sæmilega sáttir með sín 11,8 prósent. VG getur kannski orðið samstarfsflokkur Pírata í ríkisstjórn – eða ekki…?

Nú virðist eiga að hraða einhverjum stjórnarskrárbreytingum í gegnum Alþingi – líklega í von um að gera Píratana óvirka. Ætli það stoði mikið?

Það er mitt kjörtímabil og mikill gangur í efnahagslífinu. Íslenska ríkið fær klapp á bakið frá OECD. Slíkt virðist ekki hafa nein áhrif á kjósendur, ríkisstjórnin er feiki óvinsæl, samanlagt eru Framsókn og Sjálfstæðisflokkur með 32,7 prósenta fylgi. Þessar niðurstöður spegla ógeð á hefðbundnum stjórnmálum – flokkarnir eiga varla séns nema þeir fari í rækilega sjálfsskoðun, tileinki sér aðeins meiri auðmýkt, loki á grimmustu hagsmunatengslin og hefji raunverulegar umbætur í heilbrigðismálum, húsnæðismálum og peningamálastjórnun.

Nema þeir stóli á að hífa sig upp með einhverjum brellum þegar styttist í kosningar. Það gæti auðvitað líka verið, en eftir því sem mánuðum Pírata á toppnum fjölgar minnka líkurnar á að það sé hægt.