Húsnæðismálin er mikið að vefjast fyrir Framsóknarflokknum. Það er kannski ekki furða – þau voru aðalmálin hjá honum fyrir kosningar.

Eygló Harðardóttir kemur fram með nýstárlegar hugmyndir um lækkun byggingakostnaðar. Þetta eru reyndar svo róttækar hugmyndir að þar geta leyst allan vanda eins og hendi sé veifað.

Ef til dæmis, samkvæmt þeim, 100 aðilar sem koma að byggingu lækka byggingakostnað hver um 1 prósent, þá er húsið ókeypis.

Eða hvað?

Sigmundur Davíð Gunnlaugsson er svo algjörlega búinn að bíta í sig að hann vilji ekki ræða við þingheim um verðtryggingu. Honum verður ekki haggað í því efni og vill að Bjarni Benediktsson taki umræðuna.

Það er samt alveg ljóst að Bjarni og Sigmundur eru ekki á sama máli um verðtrygginguna – og það sem kemur frá Bjarna í slíkri umræðu er eitthvað allt annað en kæmi frá Sigmundi.

Það var Sigmundur en ekki Bjarni sem lofaði afnámi verðtryggingarinnar. En tregða Sigmundar er líklega til marks um að menn eru algjörlega búnir að gefast upp á því verkefni, líka Framsóknarmenn.