Umönnun aldraðra verður ekki bara dýrari, heldur munum við tæplega geta veitt öllu gömlu fólki þá þjónustu sem við teljum að eigi að vera. Fólk mun lifa lengur, fleiri verða aldraðir, það koma á markaðinn fleiri lyf sem framlengja líf fólks.

Við munum ekki geta gefið öllum þessi lyf. Opinbert heilbrigðiskerfi mun ekki standa undir því. Sum þeirra verða rándýr.

Við munum þurfa fleiri innflytjendur til að annast gamalt fólk – þeir munu ekki allir tala íslensku, langt í frá. Ríkisrekið heilbrigðiskerfi mun eiga í vök að verjast. Það verður erfiðara og erfiðara að réttlæta að fólk geti ekki notað peningana sína til að kaupa heilbrigðisþjónustu – kaupa sig fram fyrir eins og það heitir.

Hin risastóra baby boom kynslóð er byrjuð að tínast inn á elliheimili- og öldrunarstofnanir. Hinir elstu af þessari kynslóð sem fæddist eftir stríðið eru á leiðinni þarna inn og svo komum við í humátt á eftir – sjálfur er ég fæddur undir lok tíma þessarar kynslóðar.

Hætt er við að þá verði menn farnir að velja á milli ýmissa vondra kosta í heilbrigðismálunum. Útgjaldaþrýstingurinn verður orðinn nær óbærilegur, eins og lesa má í þessari frétt. Kannski verðum við að neita okkur um ýmislegt annað til að geta veitt sómasamlega heilbrigðis- og öldrunarþjónustu.