RÚV greinir frá því, og hefur eftir greiningardeild Landsbankans, að fasteignaverð í Reykjavík muni hækka um 25 prósent á næstu þremur árum. Segir að verðið hafi hækkað um 8 og 1/2 prósent í fyrra.
Hagfræðingur hjá Landsbankanum segir að þetta sé ekki bóla.
Það er sérkennileg kenning. Hagkerfið hér er reyrt í fjármagnshöft þannig að fasteignamarkaðurinn er ofurseldur lífeyrissjóðum og fjárfestum sem eru að reyna að finna ávöxtun fyrir stórar fjárhæðir.
Það er ekkert í launa- eða hagþróun sem réttlættir slíkar ofurhækkanir á húsnæðisverði.
Margir munu eignast meira veðrými, skuldaleiðréttingin mun kannski líta aðeins öðruvísi út í ljósi þessara hækkana, en fyrir þá sem eru að leigja húsnæði eða kaupa sínar fyrstu íbúðir eru þetta afar vond tíðindi.
Guðmundur Gunnarsson, fyrrverandi formaður Rafiðnaðarsambandsins, segir um þetta á Facebook:
Á Íslandi er alþýðan með lægstu launakjör af öllum Norðurlöndunum. Gjaldmiðillinn er ónothæfur utan landsteinanna. Þjóðin er í stuttu máli með allt á hælunum í efnahagsmálum.
Er eðlilegt að fasteignaverð rjúki upp úr öllu valdi við þessar aðstæður?
