Varamaður var kosinn í mannréttindaráð Reykjavíkur í kvöld, Gústaf Níelsson. Hann er fulltrúi Framsóknar og flugvallarvina.
Gústaf hefur lengstum verið í Sjálfstæðisflokknum, hann er eins og kunnugt er bróðir þingmannsins Brynjars Níelssonar.
Gústaf var eitt sinn með útvarpsþátt á Sögu og gekk þar svo hart fram að hann þurfti að hætta, en hann er þekktur fyrir andstöðu við múslima og fyrir að vanda samkynhneigðum ekki kveðjurnar.
Vísir hefur hefur eftir Guðfinnu J. Guðmundsdóttur, borgarfulltrúa Framsóknar, að „allskonar raddir eigi að hljóma í mannréttindaráði borgarinnar“.
En svonefnd Grundvallarstefnuskrá Framsóknarflokksins er mjög afdráttarlaus hvað varðar mannréttindi:
Við berjumst fyrir mannréttindum, virðingu fyrir einstaklingnum og fjölskyldunni. Við höfnum hvers konar mismunun sem gerir greinarmun á fólki t.d. eftir kynþætti, kynferði, tungu, trú, þjóðerni, kynhneigð, búsetu eða stjórnmálaskoðunum. Við munum ávallt verja skoðana- og tjáningarfrelsi, trúfrelsi og friðhelgi einkalífs.
