Einhver þrálátasti misskilningurinn í Evrópuumræðunni á Íslandi er að ESB-aðild myndi ógna þjóðerni okkar Íslendinga.
Við sjáum í sjálfstæðiskosningunum í Skotlandi að þar eru uppi allt önnur viðhorf. Sjálfstætt Skotland myndi halda áfram í Evrópusambandinu, engum dettur annað í hug í reyndinni.
Evrópusambandið hefur nefnilega aukið áhrif minni þjóða og þjóðarbrota, þar eru skýr dæmi Katalónar og Baskar á Spáni. Sjálfstæð Katalónía myndi líka vera áfram í ESB.
Þannig er hugsanlegt að þróunin sé að Evrópa fari að brotna upp í minni ríki – undir hatti Evrópusambandsins.
Slóvakía var löngum mikill eftirbátur Tékklands efnahagslega. Svo leystist upp bandalag þessara ríkja, þau eru bæði í ESB. Nú hefur dregið mjög saman með Slóvakíu og Tékklandi.
Evrópusambandið hefur verið mjög örlátt með styrki til jaðarsvæða. Það er til dæmis spurning hvort okkur gengi ekki betur að halda íslenskunni innan ESB en utan þess? Menningarumhverfið er þannig að ofurvald enskunnar verður sífellt ágengara í gegnum tölvur og sjónvarp. Frá ESB gætum við sótt aðstoð til að viðhalda tungunni – ef við á annað borð kjósum að gera það?
