Þessi stórkostlega ljósmynd er af Ruby Bridges. Árið er 1960, hún var fyrsta svarta stúlkan sem fór í skóla í suðurríkjum Bandaríkjanna sem hafði eingöngu verið ætlaður fyrir hvít börn. Þarna var hún sjö ára, staðurinn var New Orleans.
Það þurfti alríkislögreglumenn til að fylgja henni í og úr skóla. Aðeins einn af kennurum skólans, Barbara Henry, féllst á að kenna henni. Þær voru tvær einar í kennslustundunum. Foreldrar hvítra barna létu þau hætta í skólanum í mótmælaskyni.
Ýmsu lauslegu var hent í hana og ein hótunin var að eitra fyrir henni. Lögreglumennirnir leyfðu Ruby því ekki að borða neitt nema það sem hún kom með að heiman. Einhver setti svarta dúkku í líkkistu fyrir utan skólann.
Ruby var mjög hugrökk þótt hún væri ung að árum og aldrei grét hún.
Ruby Bridges varð sextug fyrir fáeinum dögum. Það er ekki lengra síðan þetta var. Hún er af minni kynslóð. Hún býr ennþá í New Orleans. Þessir atburðir urðu til þess að einn helsti listmálari Bandaríkjanna, Norman Rockwell, málaði mynd af Ruby og fyrsta degi hennar í skólanum.
Sterkari fyrirmynd í mannréttindabaráttu er varla hægt að hugsa sér en þessa litlu huguðu stúlku með skóladótið sitt.
