Aðalfréttin varðand lekamálið er varla harðort bréf Hönnu Birnu Kristjánsdóttur þar sem hún vegur ótt og títt að umboðsmanni Alþingis, þar er á ferð stjórnmálamaður sem er að reyna að lágmarka skaða sinn,  heldur það sem kemur fram í bréfi umboðsmanns. Þar eru rakin samskipti Hönnu Birnu og lögreglunnar varðandi lekamálið og kemur í ljós að hún hafi margoft rætt það við lögreglustjóra – sagt að lögreglan væri að ganga of langt og fleira í þeim dúr.

Reyndar er þetta bréf þannig að spurningin um afsögn ráðherrans verður mjög áleitin.

Meðal annars er haft eftir Stefáni Eiríkssyni lögreglustjóra í því að –

…hann hafi fengið símtöl frá ráðherra þar sem hún var að gera athugasemdir við ýmsa þætti í rannsókninni og spyrja margvíslegra spurninga og teldi að rannsóknin væri of ítarleg og óskaði eftir upplýsingum um meðferð trúnaðargagna og annað í þeim dúr og líka það, og ég kom því á framfæri við ríkissaksóknara að hún hefði sagt í þessu samtali við mig að þegar þessu máli yrði lokið þá væri það alveg ljóst í hennar huga að það þyrfti að rannsaka rannsókn lögreglu og ríkissaksóknara.