Ég er nokkuð sammála fíladelfíumanninum sem álítur að það sé heldur hallærislegt hjá borgaryfirvöldum að vera að atast í trúarsamkomunni Hátíð vonar. Þessi regnbogagjörningur á gangbrautinni við Laugardalshöll var út í hött.

Hvaðan er svona hugmynd komin?

En það verður að segjast eins og er að trú af því tagi sem þarna er boðuð er flestum Íslendingum framandi. Prédíkari af sauðahúsi Franklins Graham er frekar eins og sölumaður en kristinn klerkur. Öll umgjörðin minnir líka á sölumennsku. Og bókstafstrú eins og þarna er iðkuð er afar fjarlæg hinni mildu íslensku þjóðkirkjukristni.

Þess vegna virkaði íslenski biskupinn út úr kú þar sem hún sat við hliðina á Franklin Graham.

Það má vera að nægilega stór prósenta þjóðarinnar sé spennt fyrir svona kristindómi til að sækja slíka samkomu, aðrir hafa komið af forvitni. En almennt eru Íslendingar frjálslyndir í trúmálum.

Árni Bergmann fjallar um þetta á Facebook og segir að sé hvimleitt hvernig Grahamsamsteypan geri boðskap Jesú frá Nasaret að markaðssetningu kapítalísks stórfyrirtækis, hann rifjar upp fræga ræðu eftir Billy Graham í þessu sambandi:

„Guðs ríki er sem risastórt nútímafyrirtæki og tilgangur þess er að framleiða Fagnaðarerindi kærleikans. Guð, okkar hmneski faðir, er Eigandinn og Stjórnarformaður, Drottinn vor Jesús Kristur er aðalforstjóri og Heilagur andi fer með sölustarfið…. Guðs ríkið getur ekki starfað sem skyldi nema þið, karlar sem konur, komið með pantanir og viðskiptavin ….Við erum með bestu vöruna á markaðinum….“