Það er auðvelt að gleyma því að hin stórmerka stjórnmálakona Angela Merkel er uppfóstruð í kommúnistaríki – hún lifði undir kommúnisma í 36 ár. Það er allnokkuð.

Og þarafleiðandi er hún alin upp við allt öðruvísi menningu en jafnaldrar hennar í vestrinu. Það er ansi stór munur þar á.

Ég kom nokkrum sinnum til Austurblokkarinnar eins og það hét þá, til kommúnistaríkjanna í Austur-Evrópu – það var að sumu leyti eins og fara á aðra pánetu. Allt var svo furðulega framandlegt. Og maður fær stundum þessa tilfinningu þegar maður skoðar myndir úr gamla austrinu – ég verð að viðurkenna að ég get skoðað þær tímunum saman.

Ég hef líka gaman af myndinni af Merkel og tveimur vinkonum þeirra þar sem þær eru naktar á strönd. Þetta þótti ofurvenjulegt í Austur-Þýskalandi, í raun var ein helsta skemmtun íbúanna frjálslegt stripl. Það er heldur ekkert klámfengið við myndina, þótt reyndar séu uppi ákveðnar kenningar um að kynlífið hafi verið betra í austrinu en fyrir vestan. Kannski var bara meiri tími og fátt annað til að glepja.

Núdismi hefur reyndar alltaf verið sterkur í Þýskalandi. Ég man eftir núdistaæði sem gekk yfir Enska garðinn í München þegar ég dvaldi þar sem ungur maður. Eftirminnileg sýn frá þeim tíma er nakinn maður og skeggjaður, í sandölum, að lesa blað í strætisvagni. Enginn kippti sér upp við það.

FKK var skammstöfunin yfir hreyfingu núdista – fullu nafni heitir það Freikörperkultur. Ekki auðvelt að þýða það. Nektarstrendur voru mjög útbreiddar, ekki síst í Austur-Þýskalandi. En nú mun núdisminn ekki vera nema svipur hjá sjón.

Nú vantar bara nektarmynd af Obama, því eins og Bob Dylan söng: „Even the president of the United States/Sometimes must have to stand naked.“

Viðbót: Nú er sagt að myndin sé kannski ekki af Merkel. En það breytir ekki miklu, þetta er fjarskalega skemmtilegt fyrir því. Kannski gæti þetta orðið til þess að efla FKK, sem er langt frá því að hafa fyrri styrk í Þýskalandi.