Varla hef ég upplifað fegurri nótt. Hef aldrei séð bjartara tunglskin. Þetta er víst bjartasta tungl ársins, kallað ofurmáni.
Eyjar í kring eru slegnar silfurbirtu og það sést í kletta, akra og hús sem væru yfirleitt hulin náttmyrkri.
Loftið er óvenju tært þessa dagana, í norðvestanátt, sem veldur því að grillir í fjarlægar eyjar. Þær heita draumkenndum nöfnum eins og Syros, Delos, Mykonos og Anafi, nær eru Paros, Sifnos, Serifos, Kimolos og Milos.
Það er líka stjörnubjart, en á kirkjunni á hæðinni má sjá skugga líkt og við dyrnar – draugur?
