Einu sinni voru Íslendingar skákóðir. Það var fyrst á tíma Friðriks Ólafssonar og svo aftur þegar við áttum fjölda ungra stórmeistara, heila kynslóð sem náði góðum árangri á mótum erlendis.

Síðan hefur skákin fallið í skuggann, það er er svolítið eins og hún tilheyri öðrum tíma.

Þetta er reyndar eins úti í heimi, það var mikill uppgangur á sínum tíma í kringum afrek meistara eins og Fischers og Kasparovs, en nú vita líklega fæstir hver er heimsmeistari í skák.

En sterkasti skákmaður heims núna, samkvæmt Elo-stigum, mun vera 22ja ára Norðmaður, Magnus Carlsen að nafni. Guardian birtir skemmtilega grein um þennan unga mann. Hann þénar milljón evrur á ári og hefur gert auglýsingasamninga við ýmis fyrirtæki.

Heimsmeistarinn er hins vegar Indverjinn Viswanathan Anand, það hefur hann verið síðan 2007, en nú er hann einungis talinn sjötti sterkasti skákmaður heims.

Nú í vikunni er að hefjast í London áskorendamót – þar sem keppt er um réttinn til að tefla um heimsmeistaratitilinn við Anand. Þetta er sagt vera sterkasta skákmót allra tíma.

Þarna verður Carlsen, Kramnik sem var heimsmeistari frá 2000-2007,  Armeninn Aronian, sem er talinn þriðji sterkasti skákmaður heims, Radjabov frá Azerbaidjan, Ivantsjúk frá Úkraínu, Svidler frá Rússlandi, Gelfand frá Ísrael og nokkrir fleiri – það er alltaf eitthvað ljóðrænt við þessi skákmannanöfn.

Það verður spennandi að fylgjast með þessu – kannski nær skákin að fanga hug okkar aftur?

Magnus Carlsen á skákmótinu í Wijk aan Zee fyrr á þessu ári – með auglýsingar á fötunum.