Því var spáð hér á síðunni fyrir nokkru að áður en fjárlög yrðu endanlega afgreidd myndi finnast fé til að leggja í Landspítalann.

Flestir munu verða sáttir við það. Þetta verður vinsæl aðgerð.

En það þýðir líka, eins og þá sagði, að tæplega verður bætt við meiru annars staðar – fremur er líklegt að meira verði klipið af.

Vigdís Hauksdóttir, formaður fjárveitinganefndar, boðaði í gær meiriháttar breytingar á fjárlögunum frá fyrstu umræðu. Hún segir að verið sé að „hliðra til“ svo hægt sé að setja meira fé í heilbrigðismálin.

Þetta þýðir líklega að aðrir sem hafa orðið fyrir niðurskurði þurfa ekki að búast við að fá mikla úrlausn sinna mála, ekki einu sinni þót mótmæli hafi heyrst.

Í kvöld er boðað til fundar til að mótmæla niðurskurði hjá Ríkisútvarpinu. Það bendir allt til þess að þetta verði nokkuð fjölmennur og kröftugur fundur – listi ræðumanna bendir til þess. Hins vegar er afar ólíklegt að niðurskurðurinn til Ríkisútvarpsins verði dreginn til baka – raunar er miklu líklegra að ákveðið verði að bæta í og taka meira fé af RÚV, eins og menntamálaráðherra hefur talað um.