Í fréttum segir að hér sé fullt af ferðamönnum, en flestallt lokað.

Ég bý í miðbæ Reykjavíkur þar sem helst er von á að staðir séu opnir. Í dag var einn og einn veitingastaður opinn – mér sýndust þeir vera fullir af fólki.

Túristar hröktust um í norðanbálinu. Í svona átt er vindstrengur frá Esjunni yfir miðbænum, maður sem ég þekkti kallaði Lækjargötuna og Hljómskálagarðinn Illulág. Það á vel við í svona veðri.

Vindurinn stendur eiginlega beint á framhliðina á húsinu, ég hef verið að bíða eftir því að jólaseríurnar í garðinum fjúki.

Það er búið að auglýsa Reykjavík sem frábæran jólaáfangastað.

Og vissulega er þetta ákveðin reynsla fyrir ferðamenn, myrkur, skítaveður og allt lokað. Má kalla það upplifunarferðamennsku, að fjúka um í leit að einhverju sem er opið.

Reyndar er það svo að í lögum um helgidagafrið er kveðið á um að á aðfangadag jóla og jóladag sé óheimilt að hafa skemmtanir, viðskipta- og verslunarstarfsemi.

En gerir lögreglan núorðið eitthvað í því að framfylgja þessum lögum?