Það sem einkennir pólitíkina þessa dagana er aðallega hringl fram og til baka. Það er svosem ekki nýtt, eða hver man ekki eftir hringlinu í kringum stjórnarskrána í tíð síðustu ríkisstjórnar.

Nú er hringlið í kringum fjárlögin þar sem gengur á með vandræðalegum uppákomum og yfirlýsingum.

Talsambandið innan stjórnarliðsins virðist ekki vera sérlega gott. Maður getur gert sér í hugarlund að margir sem starfa innan ríkisgeirans hljóti að vera að fara á taugum í allri ringulreiðinni. Reyndar heyrist manni að formanni fjárlaganefndar finnist það góð tilhugsun að ríkisstarfsmenn skjálfi.

Hún er nefnilega furðu útbreidd á Íslandi sú skoðun að ríkið sé óvinur fremur en eitthvað sem við eigum öll saman. Í Skandinavíu er slíkt viðhorf gagnvart ríkinu almennt.

Í Skandinavíu tíðkast líka nokkuð sem kallast stjórnfesta. Það þýðir að menn vita nokkurn veginn að hverju þeir ganga frá ári til árs, til dæmis varðandi fjárlög. Okkur vantar svoleiðis stjórnfestu.