Ég er af fyrstu kynslóð barna sem hafði íslenskt sjónvarp. Ég man hvað maður var spenntur á aðfangadag þegar voru sýndar barnamyndir í heila tvo tíma. Það var algjör hátíð.

Nú er meira framboð, við getum jafnvel sagt offramboð, og jólamyndir eru sýndar allan desember – þykja núorðið partur af hátíðinni.

Maður getur eiginlega ekki komist hjá því að sjá myndir eins og Elf, Love Actually og National Lampoon’s Christmas Vacation. Þetta eru kvikmyndir sem mala gull um hver jól.

Ég fór að velta því fyrir mér af hverju væri ekki til íslensk jólamynd, mynd sem Íslendingar myndu horfa á í desember til að komast í jólaskap.

Er þetta ekki tilvalið fyrir snjalla kvikmyndagerðarmenn?

Stikkorð: Þorláksmessa, jólabjórinn, eitthvað í skóinn, misheppnaður sörubakstur, rjúpur eða skortur á rjúpum, veðurteppt fólk, flókin fjölskyldutengsl o.s.frv.

Elf er vinsæl jólamynd – og raunar nokkuð skemmtileg.