Það eru til hlutir sem eru kallaðir „fyrstaheimsvandamál“ – first world problems. Það er eitthvað sem væri ekki talið til vandræða neins staðar í heiminum nema þar sem eru engin vandamál. Og stundum heldur maður reyndar að Íslendingar hafi ekkert að tala um, umræðan hérna getur farið út í þvílíka endaleysu út af engu.

Til dæmis tóku menn upp á því að fárast yfir því að hafa verið „rændir stærstu stund íslenskrar knattspyrnusögu“ vegna þess að birt var auglýsing eftir fótboltaleik Íslands og Noregs í gærkvöldi.

Hér er hægt að skoða myndband af því sem gerðist – það verður að segjast eins og er að þetta er ekkert sérlega stórbrotið. Bara menn að hoppa um og fagna aðeins.

Þórunn Hrefna orðar þetta ágætlega á Facebook-síðu sinni – reyndar þannig að kallar fram krampaköst hjá fótboltaáhugamönnum:

„Margt furðulegt hef ég lesið hér á fb um dagana. En þetta endalausa karp um það hvort einhver hafi misst af því að sjá í sjónvarpinu fáeinar mínútur af nokkrum fótboltagórillum að hoppa upp og niður í svokallaðri „sigurvímu“ er ævintýralega fávitalegt. Og það er krafist afsökunarbeiðna, sökudólga og afsagna hinna seku! Hvað er eiginlega AÐ fólki?“