Ýmislegt hefur verið sagt um það að Ísland hafi verið einhvers konar kraftaverk eftir hrun, að við höfum farið leið út úr hruninu sem hafi tryggt okkur skjótari efnahagsbata en annars staðar.

Að við séum að þessu leyti fyrirmynd annarra þjóða.

Margir hafa haldið þessu á lofti, meðal annarra Ólafur Ragnar Grímsson forseti og Nóbelsverðlaunahagfræðingurinn Paul Krugman.

Flest bendir þó til þess að þetta sé hreinn misskilningur.

Um það er rætt í bloggi á vefsíðu Council on Foreign Relations. Þar skrifa Benn Steil og Dinah Walker um þetta meinta efnahagsundur og samanburð sem Krugman hefur gert á okkur og Eistlandi, Lettlandi og Írlandi.

Þessi lönd voru föst við evruna meðan gengi íslensku krónunnar hrundi. Þau eru að rétta úr kútnum efnahagslega, alls ekki verr en Ísland, segja þau, á sama tíma og við eigum í höggi við yfirvofandi kreppu vegna erlendra skulda.

Þau Steil og Walker segja að Krugman hafi heldur betur skjátlast þegar hann lofsöng íslensku gjaldeyrishöftin.