Evrópuritstjóri The Economist, John Peet, útskýrir hvernig evran bjargaðist á síðasta ári. Hann nefnir þrjá hluti – og segir að útlitið sé mun bjartara en á horfðist um mitt árið.
Í fyrsta lagi er það aðeins meiri stöðugleiki í Grikklandi og sú staðreynd að Grikkir vilja halda í evruna, eins og birtist í síðustu kosningunum þar í landi.
Í öðru lagi er það viðhorfsbreyting í Þýskalandi. Þjóðverjar vilja ekki að evran hrynji og þeir vilja ekki að ríki gangi úr evrusamstarfinu, því eru þeir viljugir til að gera meira til að bjarga gjaldmiðlinum en áður, líkt og að endursemja um skuldbindingar Grikklands.
Í þriðja lagi er það framganga Evrópska seðlabankans undir stjórn hins nýja bankastjóra, Mario Draghi. Hann lýsti því yfir að ef þyrfti væri rétt að prenta peninga til að berjast gegn kreppunni og kaupa skuldabréf ríkja sem eiga í vandræðum. Þetta hafði meðal annars þau áhrif að skuldaálag Spánverja og Ítala lækkaði verulega.
