Menn velta því fyrir sér hvað hafi gengið á í stjórnarliðinu til að fá Samfylkinguna til að setja viðræðurnar við Evrópusamband á ís – því eins og blasið við er óvíst að þær verði nokkurn tíma teknar úr frystinum aftur.

Vísbendingu er að finna í orðaskiptum Hrannars Björns Arnarsonar, aðstoðarmanns Jóhönnu Sigurðardóttur, og Baldurs Þórhallssonar á Facebook í gær. Þar segir Hrannar meðal annars:

„Telji menn að stjórnarslit og þar með algert uppnám aðildarferlisins, hefði þjónað hagsmunum aðildarsinna betur, þá er ég því algerlega ósammála.“

Þar höfum við það. Forystumenn í Samfylkingunni, þar á meðal Össur Skarphéðinsson, hafa talað eins og þetta sé besta mál fyrir aðildarferlið en Hrannar talar um yfirvofandi stjórnarslit.

Annars leikur manni forvitni að vita meira um fríverslunarsamninginn við Kína, en sagt er að mikil kraftur hafi veri settur í þær viðræður, á sama tíma og gert er hlé á viðræðunum við Evrópusambandið. Mjög lítið hefur spurst um fríverslunarviðræðurnar – hver ætli sé skýringin á því?

Í bakgrunni eru svo viðræður milli Evrópusambandsins og Bandaríkjanna um fríverslun, en nú ræða menn mikið um efnahagslegt mikilvægi slíks samnings og möguleika á að hægt verði að klára hann, en pólitískur vilji virðist vera fyrir slíkum samningi beggja vegna Atlantshafsins.