Hvers er að minnast 29. september?
Sigurður G. Guðjónsson lögmaður skýrir frá því í hvassyrtri bloggfærslu á Pressunni – fyrir fimm árum hófst einhver dramatískasta atburðarás Íslandssögunnar þegar skýrt var frá því á mánudagsmorgni að ríkið hefði tekið yfir 75 prósent af Íslandsbanka.
Nokkrum dögum síðar var allt íslenska bankakerfið hrunið – við erum ennþá að súpa seyðið af því og eigum eftir að gera lengi.
Sigurður G. setur fram kenningu sem er sjálfsagt umdeild, um að það hafi verið Seðlabankastjórinn Davíð Oddsson sem sem ýtti „efnahags- og bankahruni formlega úr vör“ þennan dag.
Hann skrifar orðrétt:
„Athöfnin fór fram að morgni mánudagsins 29. september 2005 á blaðamannafundi í Seðlabanka Íslands.
Á fundinum tilkynnti formaður bankastjórnarinnar, að ákveðið hefði verið að ríkið eignaðist 75% hlut í Glitni banka hf. og greiddi fyrir þann hlut 600 milljónir evra.
Engin skrifleg gögn voru til um þessa ákvörðun þegar hún var tilkynnt. Ekkert varð úr hlutafjárkaupunum. Afleiðing ákvörðunarinnar var sú að ríkisskuldabréf og hlutabréf hér á landi féllu strax í verði.
Efnahags-og bankahrunið er skilgetið afkvæmi þeirra alþjóðlegu stjórnmálastefnu, sem innleidd var hér á landi undir pólitískri forystu Davíðs Oddsonar, sem illu heilli komst til valda 1991. Fyrst studdur af Alþýðuflokknum, en Framsóknarflokknum frá 1995 til maí 2007.
Með Framsóknarflokknum tók Davíð upp hina gömlu stefnu að skipta ríkiseignum milli flokkshollra sjálfstæðis- og framsóknarmanna. Hópur handgenginn Sjálfstæðisflokknum fékk Landsbanka Íslands hf. en Búnaðarbanki Íslands hf., féll í skaut valinkunnra framsóknarmanna á árunum 2002 og 2003.
Sumir framsóknarmannanna hirtu um líkt leyti sjóði Samvinnutrygginga sálugu og bröskuðu með þá í eigin þágu, og eru í dag fjáðir menn og ósnertanlegir. Eftir sitja með sárt ennið tryggjendur Samvinnutrygginga, sem áttu meiri rétt til þessara sjóða en fyrrum viðskiptaráðherra framsóknar, seðlabankastjóri og forstjóri VSÍ um tíma.
Sjálfstæðisflokkur og Samfylking tóku við stjórnartaumum í maí 2007 og Davíð hvarf undir Svörtuloft Seðlabanka Íslands, þaðan stjórnaði hann landinu gegnum Geir Hilmar Haarde, þar til stjórnarsamstarfi Sjálfstæðisflokks og Samfylkingar lauk í byrjun árs 2009.
Geir Hilmar Haarde mátti svo þola það að Landsdómur dæmdi hann fyrir að gæta ekki formreglna við stjórn landsins. Formaður Samfylkingarinnar slapp úr landi og gætir núna réttinda kvenna í heimi araba á vegum Sameinuðu þjóðanna. Davíð Oddsson er einnig stikkfrí og endurskrifar nú söguna sem leigupenni nokkurra útgerðarmanna sem eiga Moggann.“
