Ég hef verið á ferðalagi á Nýja Englandi. Þetta er í raun eitthvert menningarlegasta svæði sem ég hef komið á. Ég fór út á Cape Cod, það er frábært að sjá hvernig gömul byggð er þar varðveitt. Hús eru byggð í klassískum timburhúsastíl svæðisins, í miklu samræmi við náttúruna. Þarna skiptast á sandöldur, langar strendur og skógar, þetta er auðvitað mikið ferðamannasvæði og kannski betra að vera á ferðinni núna, eftir að aðalferðamannatíminn er liðinn.

Boston er svo sérlega aðlaðandi borg, menningar- og skólaborg, full af ungu fólki, skemmtilegum veitingahúsum og menningarviðburðum. Þetta er ein þeirra borga í Bandaríkjunum þar sem er hægt að ganga hverfi úr hverfi, fræg eru brúnu múrsteinshúsin í Back Bay og gamla byggðin á Beacon Hill, en við erum á hóteli sem er rétt hjá frægum hafnaboltavelli sem nefnist Fenway Park.

Hótelið stendur við stórt torg, við fyrstu sýn virðast húsin vera gömul, en þegar maður gáir betur eru þau byggð í gömlum stíl, þannig að sumt minnir jafnvel á byggingar í París. Á miðju torginu er nútímaleg strætóstöð með léttu burðarvirki – merkilegt er að þetta er frekar þokkafullt.

Ég hef verið að leika mér að taka myndir af bókabúðum á Nýja Englandi. Þær eru víða, ekki allar stórar, en margar mjög fallegar. Bókabúðir toga í mig hvert sem ég fer, líka Barnes & Noble búðin sem er hérna hinum megin við torgið. Því miður hafa þær víða verið að týna tölunni.

En hér er til dæmis Brattle bókabúðin í miðborg Boston. Hluti starfseminnar er utandyra. Þarna má sjá myndir af rithöfundum, maður ber kennsl á W.B. Yeats, Kafka, Marquez, Dr Seuss, William Burroughs, James Joyce, Isaac Asimov, Toni Morrison og Nathaniel Hawthorne.

Og svo er hérna pínulítil bókabúð í Plymouth – staðnum þar sem pílagrímarnir svokölluðu settust að þegar þeir komu til Nýja Englands. Þar eru nokkur af elstu húsum í Bandaríkjunum.

Loks er hér mynd af bókabúð í bænum Wellfleet á Cape Cod. Hún var eiginlega lengst úti í skógi þessi búð.