Stjörnuarkitektinn Richard Rogers er í skemmtilegu viðtali í tölublaði af Evening Standard sem ég tók með mér frá London.

Rogers verður áttræður 23. júlí, hann hefur teiknað margar frægar byggingar, meðal annars Pompidou-listamiðstöðina í París og Lloyds-bankann í London.

Rogers er mikill áhugamaður um stórborgir þar sem margskonar fólk og margháttuð menning mætist. Hinar stóru fjölmenningarlegu borgir eru eitt helsta einkenni nútímans, og þar er mikil gerjun, nýsköpun og oft mikið ríkidæmi.

London er dæmi um slíka borg – Rogers segir að hún hafi batnað mikið á síðustu áratugum. Það sé auðveldara að ganga um hana – og hjóla, eins og hann gerir sjálfur.

Það hafa verið byggð mikil háhýsi í fjármálahverfinu City, en bílastæðum er samt ekki bætt við. Hæsta hús í Evrópusambandinu, The Shard, er byggt ofan á lestarstöð, segir Rogers.

Hann er þeirrar skoðunar að rétt sé að byggja upp í loftið í borgum framtíðarinnar. Lyftur séu umhverfisvænni en vegir.

Rogers segist hafa miklu meiri ástríðu fyrir borgum en fyrir þjóðum. Samkeppni milli borga sé miklu siðfágaðri en milli þjóða – og hann segist trúa því að þétt, fjölmenningarleg og kraftmikil borg eins og London sé einfaldlega besta umhverfi sem hægt sé að hugsa sér í heiminum.

Fyrir miðri mynd er stórbyggingin Leadenhall sem er hönnuð af Richard Rogers. Byggingin er í daglegu tali kölluð Rifjárnið. Húsið, sem stendur í City í London, verður tekið í notkun á næsta ári. Það er 225 metra hátt.