Obama Bandaríkjaforseti er í Berlín, hann kom fram á stórum fundi við Brandenborgarhliðið í dag. Obama ræðir við Angelu Merkel um fríverslunarsamning milli Bandaríkjanna og Evrópusambandsins.

Brátt kemur til Berlínar Ólafur Ragnar Grímsson, forseti Íslands. Þetta er opinber heimsókn, Ólafur Ragnar hefur reyndar ekki mikið látið sjá sig í ríkjum Evrópusambandsins, en ferðirnar til Kína hafa verið ansi tíðar.

Ólafur Ragnar og utanríkisráðherrann Gunnar Bragi Sveinsson koma til Berlínar á nokkrum tímamótum, þegar gert hefur verið hlé á aðildarviðræðum við Evrópusambandið – eða er kannski búið að slíta þeim?

Það eru eiginlega tvær spurningar sem vakna helst á þessum tímapunkti.

Munu Ólafur Ragnar og Gunnar Bragi skýra út fyrir leiðtogum Þýskalands að Evrópuríki séu ekki fullvalda – nema þá Ísland?

Og mun Ólafur Ragnar nefna það við Þjóðverjana að þeir hafi raun ekki viljað fá Ísland inn í Evrópusambandið?

Meðal þeirra sem þeir félagarnir hitta líklega í Berlín er Guido Westerwelle utanríkisráðherra – hann hafði uppi mjög stór orð um mikilvægi þess að Íslendingar gengju í ESB á bókastefnunni í Frankfurt fyrir einu og hálfu ári og vakti það reyndar ólund meðal sumra hér á Íslandi.