Það eru erfiðir dagar hjá Vinstri grænum sem nú horfa á Bjarta framtíð sigla framhjá sér í fylgi.

Vinstri grænir eru flokkur sem er andsnúinn Evrópusambandinu, Björt framtíð er Evrópuflokkur – en VG er í raun ábekingur Evrópusambandsumsóknarinnar.

Steingrímur J. Sigfússon gerist áhyggjufullur og segir í ávarpi til flokksmanna að óumflýjanlegt sé að endurmeta stöðu viðræðna við Evrópusambandið.

En hvernig á að gera það – þegar eru innan við fjórir mánuðir til kosninga? Hann talar um að það sé verkefni næstu vikna að ákveða hvernig verður tekið á málinu.

Er þá Steingrímur að leggja til að viðræðunum verði slitið, að þeim verði frestað eða að einungis verði talað meira um gang mála? Þetta er býsna óljóst hjá formanninum, en það er vissulega rétt að viðræðurnar hafa dregist mjög á langinn – og það er enn langt að bíða niðurstöðu. Og á hitt má líka benda á að Evrópusambandið hefur tekið talsverðum breytingum síðan Íslendingar sóttu um aðild fyrir þremur og hálfu ári.

Reyndar er dóms að vænta í Icesave-málinu síðar í þessum mánuði. Niðurstaða hans kann að hafa áhrif á afstöðuna til ESB – sérstaklega ef dæmt verður gegn Íslendingum. Það er vel hugsanlegt að sú verði niðurstaðan, en þó yrði það nokkuð kyndugt í ljósi þess að innan Evrópusambandsins er í burðarliðnum sameiginlegt innistæðutryggingakerfi og fjármálaeftirlit. Það var ekki veruleikinn þegar Íslendingar sóttu um.