Rithöfundurinn Salman Rushdie hefur gefið út endurminningar sínar. Þær nefnast Joseph Anton. Þetta er nafnið sem Rushdie tók upp þegar hann var í felum vegna dauðadómsins sem Khomeini erkiklerkur í Íran kvað upp yfir honum.
Joseph er nafn Josephs Conrad, Anton er komið frá Tsjekov. Þetta eru tveir af frábærustu rithöfundum sögunnar.
Rushdie segir að mest hafi niðurlæging sín orðið þegar hann fór að biðjast afsökunar á skáldsögunni Sálmum Satans. Þetta var á tímanum þegar þýðendur hans og útgefendur voru í lífshættu, sumir voru reyndar myrtir – þýðandi Rushdies í Noregi var skotinn en lifði af. Rushdie segist hafa verið fullur örvæntingar á þessum tíma, hann skrifaði grein þar sem hann sagðist vera múslimi og þaðan kæmu gildi hans.
Nú segist hann vera trúleysingi í anda látins vinar síns, Christopher Hitchens.
Í viðtali við Guardian segir Rushdie athyglisverðan hlut: Að bók eins og Sálmar Satans fengist líklega ekki útgefin nú. Enginn myndi þora það.
