Evrópuvaktin setur fram furðulega samsæriskenningu um að Ríkisútvarpið hafi sagt upp fréttaritara á Suðurlandi til að spara peninga til að eiga fyrir fréttaritara í Brussel.

Hann eigi svo að reka áróður fyrir aðild Íslands.

Annar aðalforsprakki Evrópuvaktarinnar notaði styrk upp á margar milljónir sem hann fékk frá Alþingi til að ferðast til Brussel og kynna sér málin þar af eigin raun. Hann taldi semsagt að eftir einhverju væri að slægjast þar.

Ég veit ekkert um hvort Ríkisútvarpið ætlar að koma sér upp fréttaritara í Brussel, en það er sannarlega ástæða til þess.

Þar í borg eru ekki aðeins höfuðstöðvar ESB, heldur hefur EFTA þar líka skrifstofu – og þar af leiðandi er þar aðsetur EES-samstarfsins sem hefur svo mikil áhrif á líf okkar og athafnir. Margir hafa bent á, og ekki síst andstæðingar ESB-aðildar, að við fylgjumst alltof illa með því sem gerist á þessum vettvangi.

Allir ríkisfjölmiðlar á Norðurlöndunum hafa fréttaritara í Brussel – sem og margir aðrir norrænir fjölmiðlar. Við erum smá og fá og höfum kannski ekki ráð á þessu – en tengingin sem er nafnd hér að ofan er fráleit og ekki ætluð til annars en að skapa tortryggni og leiðindi.