Sagt er að innan utanríkisráðuneytisins sæki menn það nú fast að klára fríverslunarsamning við Kína. Fimmtu lotu samninganna var lokið nú fyrir jólin og í byrjun næsta árs á að halda áfram.
Einhverjum kann að finnast það kyndugt í ljósi þess að á sama tíma eru í gangi samningaviðræður um aðild að Evrópusambandinu.
Það verður forvitnilegt að sjá hver verður niðurstaða þessara viðræðna – ef þær klárast. Markmiðið er auðvitað að auka aðgengi fyrir íslenskar vörur á markaði í Kína. En Kína er náttúrlega langt í burtu og það er spurning hversu mikið er í húfi í því sambandi.
En á móti þurfum við að gefa eftir hvað varðar innflutning frá þessu risaríki, sem getur undirboðið allt og alla á mörkuðum, varðandi kaup Kínverja á jarðnæði á Íslandi, varðandi fjárfestingar þeirra hér – og svo eru auðvitað spurningar sem tengjast því sem er verulega ábótavant í Kína eins og til dæmis réttindum verkafólks, höfundarrétti og ekki síst því að Kína er hvorki réttarríki né lýðræðisríki og venjuleg markaðslögmál eru ekki í gildi þar eystra.
