Efni Kiljunnar annað kvöld er venju fremur fjölbreytt.

Við fáum til okkar rithöfundinn Auði Övu Ólafsdóttur, en hún er að senda frá sér nýja skáldsögu sem nefnist Undantekningin. Síðasta skáldsaga Auðar, Afleggjarinn, hefur selst í risaupplögum í Evrópu, ekki síst í Frakklandi.

Við förum austur á land og heimsækjum elsta höfundinn sem gefur út bók fyrir jólin, það er Vilhjálmur Hjálmarsson, fyrrverandi alþingismaður og menntamálaráðherra. Vilhjálmur er 98 ára – eldklár í kollinum.

Til okkar kemur Dr. Gunni með bókina Stuð vors lands. Þetta er mikill prentgripur, saga íslenskrar dægurtónlistar sem er ríkulega myndskreytt og skemmtilega framsett. Við hlýðum á nokkur tóndæmi með Gunna; meðal annars með hljómsveitunum Dátum og Haukum.

Gagnrýnendur þáttarins fjalla um bækurnar Appelsínur frá Abkhasíu eftir Jón Ólafsson og Kortið og landið eftir Michel Houellebecq.

Bragi fjallar um gleymdan en afkastamikinn rithöfund sem hét Steindór Sigurðsson.

Auður Ava hefur notið mikillar velgengni í Frakklandi. Mætti jafnvel segja að frægð hennar komi að utan.