Leiðarar Morgunblaðisins koma manni ennþá á óvart.

Í síðustu viku var þar skrifað um hina alræmdu Advania/Skýrr-skýrslu Ríkisendurskoðunar.

Á leiðaranum mátti skilja að fréttamennska væri einhvers konar fáfengilegt sport – sem væri ekki iðkað af alvörufólki.

Eru þetta skilaboðin sem berast inn á fréttadeild blaðsins? Eða kannski passa blaðamennirnir sig á að lesa ekki ritstjórnarskrifin.

Í dag má lesa að fjármálaráðherra hafi „veist“ að íslensku krónunni.

Þetta er skrifað af manni sem stóð fyrir einhverri einkennilegustu efnahagstilraun allra tíma.

Þar var gengi krónunnar skrúfað upp til að búa til fölsk lífskjör í landinu. Þetta gat ekki endað nema á einn veg, með skelfingu.

Þá hrundi gengi krónunnar – með þeim afleiðingum að lífskjörunum var sópað burt nánast á einni nóttu og gott betur.

Við munum þurfa að lifa með afleiðingum þessa langa hríð enn. Hafi verið gerð tilraun til að ganga af íslensku krónunni dauðri, þá var það þarna.