Það er sagt að Kolaportið muni loka í langan tíma vegna framkvæmda við tollstöðvarhúsið.

Sem er leitt, Kolaportið er partur af mannlífinu í Reykjavík.

En kannski er kominn tími til að huga að stærra og fallegra húsnæði fyrir markað í Reykjavík.

Framtakssamir einstaklingar hafa verið að skoða möguleika á að koma upp alvöru matarmarkaði í borginni og þá er einkum horft á svæðið við höfnina.

Það er frekar þröngt um matinn í Kolaportinu og loftræstingin er ekki góð.

Þessi starfsemi á skilið að fá betra húsnæði – og þá væri vonandi hægt að hafa eitthvað meira fallegt, gott og skemmtilegt – grænmeti, vörur frá bændum, fjölbreyttara úrval af fiski, sætindi, kökur, krydd.

Jú og matvæli sem hægt væri að borða á staðnum.

Slíkar kauphallir eru víða í borgum – til dæmis eru þær vinsælar á Norðurlöndunum.

Hér væri þetta tilbreyting frá hinu einhæfa úrvali sem er að finna í stórmörkuðunum.

Úr Saluhallen í Stokkhólmi.