Pressan birtir yfirlýsingu frá bresk/ítölskum manni sem sagður er vera „stjörnulögmaður“. Hann virðist hafa sterkar skoðanir á Kaupþingsmálinu. Ekki kemur fram á Pressunni hvar yfirlýsingin hefur birst, einungis að Pressan hafi hana undir höndum.

Á Wikipedia má lesa um þennan mann. Giovanni di Stefano, og er sagt að hann leggi sig fram um að vera talsmaður skrattans. Hann hafi tekið þátt í að verja skúrka eins og Saddam Hussein, Tariq Aziz, Efnavopna-Ali og Gary Glitter. Hann hefur líka aðstoðað Moors-morðingjann fræga, Ian Brady, og átt í furðulegum samskiptum við yfirvöld vegna þess.

Margt fleira virðist vera einkennilegt í fari og sögu þessa manns, hann er mislukkaður pólitíkus, tónlistarmaður, en meðal vina hans og viðskiptafélaga hafa verið Slobodan Milosevic og alræmdur serbneskur fjöldamorðingi og glæpaforingi sem kallaður var Arkan, var eftirlýstur fyrir glæpi gegn mannkyni en var myrtur árið 2000.

Viðbót 13. maí, kl. 9.16

Bent er á að di Stefano hafi líka átt að skjólstæðingi Paul Aðalsteinsson, mann af íslenskum ættum, öðru nafni Ian Strachan, sem ákærður var fyrir nokkrum árum fyrir að kúga fé út úr meðlimi bresku konungsfjölskyldunnar og birst hafi fréttir um tengsl di Stefanos við Ísland.