Ég er að blaða í gegnum skýrslu þingmannanefndarinnar. Hana má finna hér á vef Alþingis. Athyglin beinist aðallega að því hvort einhverjir ráðamenn verði dregnir fyrir landsdóm en það er ýmislegt fleira í skýrslunni – enda var nefndinni falið að draga ályktanir af skýrslu rannsóknarnefndar:

Meðal annars kemur fram í tillögu til þingsályktunar sem öll nefndin leggur fram að:

– starfshættir þingsins verði teknir til endurskoðunar

– taka verði gagnrýni á íslenska stjórnmálamenningu alvarlega

– skýrsla rannsóknarnefndar sé áfellisdómur yfir stjórnvöldum, stjórnmálamönnum og stjórsýslu

– stjórnendur og helstu eigendur fjármálafyrirtækja beri mesta ábyrgð á bankahruninu

– að eftirlitsstofnanir hafi brugðist.

Ennfremur er lagt til að Þjóðhagsstofnun verði endurreist, að fari fram óháð rannsókn á starfsemi lífeyrissjóða, falli sparisjóða og stjórnsýsluúttekt á Fjármálaeftirliti og Seðlabanka Íslands og að eftirlitshlutverk alþingis verði styrkt meðal annars með lögum um rannsóknarnefndir.

Nefndin leggur til að endurskoðuð verði lög um landsdóm.

Nefndin telur að stjórnendur Landsbankans beri mesta ábyrgð á afleiðingum Icesave reikninganna.

Nefndin fjallar um Seðlabankann og gagnrýnir að ekki hafi verið þegið boð frá breska Seðlabankanum um aðstoð við að minnka bankakerfið íslenska, bankinn er einnig gagnrýndur fyrir að hafa ekki þrýst á flutning erlendra innlánsreikninga yfir í dótturfélög og fyrir að hafa ekki skoðað hvaða áhætta fælist í þeim fyrir fjármálakerfi Íslands. Nefndin gagnrýnir einnig veðlán Seðlabankans og yfirtökuna á Glitni sem segir að hafi gerst án þess að nægilegar upplýsingar lægju fyrir. Einnig er sagt að mikið hafi skort á að samskipti stjórnvalda og stjórnar Seðlabankans hafi verið eðlileg.

Nokkrir þingmenn í nefndinni lögðu til að gerð yrði rannsókn á einkavæðingu bankanna og hvernig staðið var að henni. Um það náðist ekki samstaða.