Mál manna er að breytingar séu framundan á ríkisstjórninni. Það verði stokkað upp í liðinu um það leyti að þing kemur saman í næsta mánuði.

Innan flokkanna er í gangi ráðherrakapall. Hann felst meðal annars í því að úr heilbrigðis- og félagsmálaráðuneytum verður til velferðarráðuneyti og úr dómsmála- og samgönguráðuneytum verður innanríkisráðuneyti. Hins vegar er talað um að beðið verði með breytinguna sem felur í sér að iðnaðar-, landbúnaðar- og samgönguráðuneyti sameinast í atvinnuvegaráðuneyti.

Það er talið líklegast að í þessum tilfæringum fari Ragna Árnadóttir og Gylfi Magnússon úr ríkisstjórninni. Stjórnarliðum þykir óþægileg tilhugsun að þurfa að verja Gylfa gegn vantrausti í þinginu, þótt það yrði gert ef þannig ber undir. Það er reyndar sagt að Gylfa langi ekkert að hætta.

Hjá Vinstri grænum stendur valið um Álfheiði Ingadóttur og Jón Bjarnason, annað hvort þeirra hættir líklega. Í staðinn kemur Ögmundur Jónasson inn í ríkisstjórn. Það er talið nauðsynlegt að hann sé innanborðs.

Og hjá Samfylkingu er sennilegt að Kristján Möller sé á útleið. Guðbjartur Hannesson er nefndur sem hugsanlegur eftirmaður hans, en líka hefur verið nefnt nafn Oddnýjar G. Harðardóttur sem kom inn á þing í síðustu kosningum og var áður bæjarstjóri í Garði. Með því væri hægt að byggja hana upp sem framtíðarleiðtoga flokksins í Suðurkjördæmi.

Kristján Möller gæti þá orðið forseti Alþingis – verði hægt að telja Ástu Ragnheiði Jóhannesdóttur á að láta það embætti af hendi.

Enn er þetta á vangaveltustiginu, það flækir náttúrlega málin að það þarf að skáka til ráðherrum vegna sameiningar ráðuneytanna – þetta yrði líka í fyrsta skipti í langan tíma að ráðherrum fækkar á Íslandi. Ráðherrar hafa verið tólf talsins síðan 1999 að undanskildum stuttum tíma í fyrra þegar Samfylking og VG mynduðu minnihlutastjórn.